
第一世噶玛巴教言集1KM32དཔལ་རྡོ་རྗེ་རྣལ་འབྱོར་མའི་གསང་སྒྲུབ་བཞུགས་སོ། །
1-2-229b
༄༅། །དཔལ་རྡོ་རྗེ་རྣལ་འབྱོར་མའི་གསང་སྒྲུབ་བཞུགས་སོ། །
༄། །དེའི་རྒྱུད་པ།
༄༅། །དཔལ་རྡོ་རྗེ་རྣལ་འབྱོར་མའི་གསང་སྒྲུབ་བཞུགས་སོ། །རྒྱ་གར་སྐད་དུ། ཤྲཱི་བཛྲ་ཡོ་གི་ནི་གུ་ཧྱ་ས་དྷ་ན་མ། བོད་སྐད་དུ། དཔལ་རྡོ་རྗེ་རྣལ་འབྱོར་མའི་གསང་བའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །ཤིན་ཏུ་བདེ་བ་རྒྱས་མཛད་མ། །འདོད་པའི་དོན་རྣམས་སྟེར་མཛད་མ། །དངོས་གྲུབ་ལྷན་སྐྱེས་སྟེར་མཛད་མ། །ནམ་མཁའ་མེ་འོད་ཟླ་ཉི་འདུད། །དཔལ་ལྡན་རབ་འབར་རྣལ་འབྱོར་མའི། །སྡོམ་པ་རྒྱ་མཚོར་གསུངས་པ་ལས། །མདོར་བསྡུས་བདག་གིས་བསྟན་པ་བྱ། །མོས་པའི་དོན་བྱས་འདི་བསྒྲུབ་བྱ། །ཉིད་ལ་ཉིད་ཀྱིས་བྱིན་རླབས་འཕོ་བ་སེམས་ལ་ཐོབ། །བླ་མ་ཁུར་ཞིང་བསྒྲུབ་བརྩོན༑ ༑བློ་ལྡན་ངང་རྒྱུད་བཟང་ལས་འོངས། །དེ་ལས་གཞན་ལ་མིན་པའོ། །དུར་ཁྲོད་དམ་མམ་ཤིང་གཅིག་གམ། །རི་དགོན་ལྗོངས་སམ་དབེན་གནས་སམ། །ལྷ་ཁང་ཁང་སྟོང་འདྲེ་གནས་སམ། །ཉམས་དགའི་གནས་སུ་འདུག་བྱས་ལ། །བདེ་བའི་སྟན་ལ་འདུག་བྱས་ཏེ། །མི་གཡོ་བསམ་གཏན་སྐྱིལ་ཀྲུང་བཅའ། །སེམས་བསྐྱེད་སྔོན་དུ་བཏང་ནས་ནི། །རང་ཉིད་སྐད་ཅིག་ལྷར་བསྒོམ་ལ། །རང་གི་སྙིང་གར་པད་ཉིའི་སྟེང་། །བཾ་ལས་འོད་ཟེར་ཕྱོགས་བཅུར་འཕྲོས། །སེམས་ཅན་ཐམས་ཅད་ལ་ཕོག་པས་རྣལ་འབྱོར་མར། །གྱུར་ནས་འོད་ཟེར་བཾ་ལ་ཐིམ། །ཡང་འཕྲོས་འཕགས་པ་རྣམས་མཆོད་འོད་གྱུར་ནས། །ཡང་ནི་བཾ་ལ་
1-2-230a
༄༅། །ཐིམ་པར་བསམ། །རང་ལུས་འོད་གསལ་སྟོང་ཁམས་ཁྱབ། །རང་ལུས་འོད་ཕུང་ཡི་གེ་བམ། །གྱུར་ནས་ཡི་གེ་ཆོས་སྐུར་རོ་གཅིག་པས་བཾ་ལ་ཐིམ། བཾ་དེ་ཡོངས་སུ་གྱུར་པ་ལས། །བདག་ཉིད་རྡོ་རྗེ་རྣལ་འབྱོར་མ། །ཞལ་གཅིག་ཕྱག་བདེན་གཉིས་མཚོན་པ་གཉིས་སྐུ་མདོག་ཐུགས་རྗེ་ཆེ་བས་དམར། །འཁོར་བའི་སྐྱོན་གྱིས་མ་གོས་པ་གཅེར་བུ་སྤྱན་གསུམ་དབུ་སྐྲ་གཟུང་འཛིན་ལས་གྲོལ་བས་གྲོལ། །ཐོད་སྐམ་ལྔ་ནི་རིགས་ལྔའི་རྒྱན། །ཐོད་རློན་ལྔ་བཅུའི་འདུ་བྱེད་ལྔ་བཅུ་དག་དོ་ཤལ་མངའ། །ཕྱག་གཡས་གྲི་གུག་གཡོན་སྐལ་ལྡན་ལ་དངོས་གྲུབ་སྟེར་བའོ་ཐོད་ཁྲག །ཁ་ཊྭཱཾ་ཁ་དང་ཡང་དག་ཐབས་དང་ཤེས་རབ་གནས། །དར་དཔྱངས་དག་གིས་རབ་ཏུ་མཛེས། །བཅུ་དྲུག་ལོན་པའི་ན་ཚོད་ལྟར། །སྐུ་ནི་ཤིན་ཏུ་རྒྱས་པ་ལ། །པདྨ་ཉི་མའི་གདན་སྟེང་ན། །གཡས་བསྐུམ་གཡོན་བརྐྱང་ཐུགས་རྗེ་འདྲེན་པའི་གར་ཚུལ་བཞུགས། །ཐུགས་ཀར་པདྨ་ཉི་མའི་གདན། །བཾ་ལས་སྔགས་ཕྲེང་གསལ་བར་བསྒོམ། །ལྷན་སྐྱེས་ངོ་བོ་གཅིག་རྫོགས་སུ། །མི་སྐྱོ་བར་དུ་གསལ་བར་བསྒོམ། །དེ་ལས་སྐྱོ་བར་གྱུར་པ་དང་། །རྫོགས་པའི་རིམ་པ་ཟབ་མོའི་དོན། །རང་གི་ལྷ་སྐུ་གསལ་སྟོང་དུ། །ཡེ་ཡིན་པར་ནི་གསལ་གདབ་བྱ། །དེ་ནས་འདི་ལྟར་བསྒོམ་བྱ་སྟེ། །རང་གི་ལྟེ་བའི་དབུས་ཉིད་དུ། །ཆོས་འབྱུང་གྲུ་གསུམ་ཁ་དོག་དམར། །དེ་དབུས་པད་མ་འདབ་བཞིའི་སྟེང་། །དབུས་སུ་བཾ་དང་ཡི་གེ་བཞི། །དེའང་
1-2-230b
གཡོན་དུ་འཁོར་བར་བསམ། །རྩ་གསུམ་གསལ་གདབ་དབུ་མར་མེ། །རླུང་ནི་ཐུབ་ཚད་གནས་པར་བྱ། །སྟེང་རླུང་གིས་ནི་དོན་བསྒོམ་ནི། །འཁོར་ལོ་དཀར་པོ་ཡིག་འབྲུར་བཅས། །སྣ་ནས་རྔུབ་ཅིང་དྲག་ཏུ་མནན༑ ༑འོག་རླུང་དག་ལ་བསྒོམ་སློབ་ན། །པདྨ་དམར་པོ་ལྟེ་བར་ཨཱཿ རྒྱུ་ཞབས་བརྡབ་ཅིང་འོག་སྒོ་བསྡམ། །ཐབས་དང་ཤེས་རབ་བསྒོམ་པའམ། །སྟེང་འོག་བུམ་པ་ཅན་ཞེས་བྱ། །འཕོ་བ་སྐར་ཁུང་ཅན་ཡང་ཡིན། །དྲོད་སྐྱེ་འདོད་ན་མེ་རླུང་ལ། །བདེ་བ་བསྒོམ་ན་འཁོར་ལོ་བཞི། །འོད་གསལ་སྙིང་ཁའི་ཧཱུཾ་ལས་མེ། །བྱུང་བས་ཐམས་ཅད་བསྲེག་ཅིང་བསྒོམ། །སྐབས་སུ་དྲན་དང་འདུན་པ་ཡིས། །རྨི་ལམ་ལྟ་བུར་ཐམས་ཅད་བསྒོམ། །གཉིད་དང་བསྲེ་ན་སྙིང་ཁར་ཧཱུཾ། །རྨི་ལམ་འཛིན་ན་འདུན་པ་བཏང་། །སྦྱོང་ན་ཕུང་པོ་ཞི་གྲོལ་བྱ། །ལྷ་སྐུ་སྒྱུ་མ་ལྟ་བུ་འམ། །ཀེང་རུས་རི་རབ་མེ་ཉིད་དུ། །སྟོང་ཁམས་ཐམས་ཅད་གསལ་བར་བསྲེག །ཡ་ང་བག་ཚ་མ་ལུས་སྤང་། །ད་ལྟ་སྒྱུ་ལུས་འོད་གསལ་བསྒོམ། །འཆི་ཁར་འཕོ་བ་འཇུག་པས་འཕང་། །ཡང་ན་ཕྱག་རྒྱ་ཆེ་དོན་བཞག །དེ་ལྟར་བསྒོམས་པས་རྟགས་རྣམས་འབྱུང་། །དེ་ལ་བརྟེན་ནས་ལུས་དྲོད་སྐྱེ། །བདེ་བ་ལ་བརྟེན་རྟོག་པ་འགག །མི་རྟོག་པའང་ཤུགས་ལ་འོང་། །རྟོག་མེད་ངང་ལ་གནས་པར་བྱ། །དེའང་བློ་ནི་སུན་མི་དབྱུང་། །ཉམས་མ་སྐྱེས་ན་ལས་ཕྱག་རྒྱ། །འདུ་ཤེས་གསུམ་ལྡན་
1-2-231a
༄༅། །བཞིན་བཟང་མ། །བཅུ་དྲུག་ཉི་ཤུ་གཅིག་མན་ཆད། །རང་དབང་བསྐུར་ཞིང་བློ་སྦྱངས་ལ། །ལྷན་སྐྱེས་ཧཾ་ཨཾ་ཐིག་ལེར་བཟུང་། །མིག་བཟློག་ཧཱུཾ་དྲང་མཐེ་བོང་བསྐུམ། །དེ་ལ་བདེ་བ་སྐྱེ་བར་འགྱུར༑ ༑དཔེའི་དོན་ལ་བློ་ཡང་སྦྱང་། །མཇུག་ཏུ་ཐམས་ཅད་བདེ་བར་བསམ། །དེ་ནི་མཆོག་གི་དངོས་གྲུབ་ཐོབ། །དེ་རྣམས་རྫོགས་རིམ་བསྒོམ་པའོ། །ཡང་ན་བཟླས་པས་བསྒོམ་པ་ནི། །བློ་འབྲིང་རྡོ་རྗེའི་བཟླས་པ་ནི། །རང་གི་ཐུགས་ཀར་པད་ཉིའི་སྟེང་། །བཾ་ལ་སྔགས་ཀྱི་བསྐོར་བར་བསམ། །དེའང་གཡོན་དུ་འཁོར་བར་བསམ། །སྔགས་དང་ཡི་གེ་བཾ་ནི་དམར། །འདབ་བཞིའི་ཡི་གེ་བཞི་པོ་ནི། །སྣ་ཚོགས་ཁ་དོག་སྣ་བཞིའོ། །དེ་ལས་འོད་འཕྲོས་སྦྱང་བཞུ་བྱས། །འཕགས་མཆོད་མཆོག་གི་དངོས་གྲུབ་བླང་། །ཐུན་མོང་དག་ཀྱང་གྲུབ་པར་བསྒོམ། །ཨོཾ་བཛྲ་བཻ་རོ་ཙ་ནི་ཡེ་ཧ་རི་ནི་ས་ཧཱུཾ་ཕཊ། ཞེས་པ་འབུམ་ཚོ་ལྔ་བཅུ་བསྐྱལ༑ ༑སྨྲ་བཅད་བྱས་ནས་བཟླས་ན་ཡིན། །གཞན་དུ་བརྩམ་པར་མི་བྱའོ། །དེ་ལྟར་བརྟན་པར་གྱུར་ནས་ནི། །དེ་ནས་སྐལ་ལྡན་བཟུང་བྱ་སྟེ། །གྲངས་དང་མཚན་མ་མཐོང་གྱུར་ནས། །ཞག་བདུན་ཧ་རི་ནི་ས་བཟླས། །གནས་ཁང་ཉམས་དགའ་ཆག་ཆག་གདབ། །དཀྱིལ་འཁོར་ཆུ་དང་ཆང་གིས་བྱུགས། །ཆོས་འབྱུང་ཕོ་བྲང་མཁའ་འགྲོ་ཡི། །ས་བོན་ལྔ་ནི་ལེགས་པར་བྲིས། །སིན་དྷུ་ར་བཟང་དེ་ལ་ཆང་། །དམ་
1-2-231b
ཚིག་ལྡན་པའི་བདུད་རྩི་དང་། །བུམ་པ་མཚན་ལྡན་བཀྲ་ཤིས་ལེགས། །ཡོ་བྱད་ཐམས་ཅད་ཚང་བ་དང་། །མཆོད་པ་སྣ་ཚོགས་བྱས་ནས་ནི། །སློབ་མ་ཡང་དག་བཟུང་བར་བྱ། །རྣལ་འབྱོར་དུས་བཟང་མཆོད་པ་ནི། །ཉམས་དགའི་གནས་སུ་དཀྱིལ་འཁོར་བྲི། །མཁའ་འགྲོ་ལྔ་ནི་མཆོད་ལྔས་མཆོད། །དབང་དུ་བསྡུ་བའི་ཆོ་ག་ནི། །ལྷར་བསམ་ཐུགས་ཀར་བཾ་དང་ནི། །ཡི་གེ་བཞི་ནི་བསམ་འོད་འཕྲོས། །རྩ་བའི་སྔགས་ལ་འདི་བཟླས་བྱ། །ཆེ་གེ་མོ་བཛྲ་བ་རཱ་ཧི་ཨ་བེ་ཤ་ཡ་ཨ་ཨ། ཞེས་བརྗོད་ཅིང་། རང་དང་དཀྱིལ་འཁོར་གཉིས་ལས་གྲི་གུག་སྤྲོས། །བསྒྲུབ་བྱ་བཀུག་ནས་དབང་དུ་བསམ། །ཚོགས་གཏོར་དག་ཀྱང་བྱ་བའོ༑ ༑རང་གཞན་བར་ཆད་བསལ་བ་ནི། །མཐུན་པའི་གནས་སུ་དཀྱིལ་འཁོར་བྲི། །བླ་མ་དཀོན་མཆོག་མཆོད་པ་བྱ། །ཚོགས་དང་གཏོར་མ་ཀུན་དང་བཏང་། །བདག་ཉིད་ལྷ་བསྒོམ་འཁོར་ལོ་བསྒོམ། །ལྷ་དང་འཁོར་ལོ་ཐ་མི་དད། །ནད་པའི་སྙིང་ཁར་སོང་ནས་ནི། །པདྨ་མི་འཁོར་འཁོར་ལོ་འཁོར། །ནད་གདོན་རྡུལ་ཕྲན་ཙམ་དུ་ཡང་། །མི་གནས་འཁོར་ལོས་བཏགས་པར་བསམ། །རང་གཞན་གཉིས་ཀས་དེ་ལྟར་བསྒོམ། །སྔགས་ནི་གོང་ལ་འདི་བཏགས་བཟླ། །སརྦ་ཛཾ་ར་ནི་དྲ་སྭཱ་ཧཱ། །ཞེས་པ་མ་སོས་བར་དུ་བཟླ། །གཞན་ཡང་རྣལ་འབྱོར་ཕྲིན་ལས་ནི། །བསྒྲུབ་པར་འདོད་ན་སྦྱིན་བསྲེག་བྱ། །ཞི་བ་བཟླུམ་པོ་ཁ་
1-2-232a
༄༅། །དོག་དཀར། །ཤིང་འཇམ་དྲི་ཞིམ་དུར་བ་དང་། །མར་དང་ཁུར་བ་ཞོ་དང་ནི། །འོ་མ་མེ་ཏོག་བསྲེག་རྫས་ཡིན། །ཏིལ་དཀར་སྨན་ཀྱང་བ་ལུས་བསྲེག ཁ་ཡང་ཤར་ལྟས་མེ་ཡང་ནི། །དགེ་འདུན་གནས་ནས་སྔ་དྲོ་སྦར། །ཞི་བ་ཤཱནྟིཾ་ཀུ་རུ་ཡེ་སྭཱ་ཧཱ། །ལན་གྲངས་ཉི་ཤུ་རྩ་གཅིག་དབུལ། །ཀུན་ལ་མཆོད་དང་གཏོར་ཚོགས་བྱ། །རྒྱས་པ་བྱང་ལ་ཁ་དོག་སེར། །ཤིང་ནི་སེར་པོ་འབྲས་བུ་ཅན། །དབྱིབས་ནི་གྲུ་བཞི་རྒྱས་པའི་མེ། །ཁུར་བ་མར་ཁུ་འབྲས་ཆན་དང་། །མེ་ཏོག་སེར་པོ་ལ་སོགས་བསྲེག །ཚེ་དང་བསོད་ནམས་རྒྱས་པར་བསྒོམ། །སརྦ་པུཥྚིཾ་ཀུ་རུ་ཡེ་སྭཱ་ཧཱ། །ལན་ནི་ཉི་ཤུ་རྩ་གཅིག་འབུལ། །དབང་ལ་ཟླ་གམ་དམར་པོ་བྱ། །ཤིང་ནི་དམར་པོ་འོ་མ་ཅན། །མར་དང་ཁུར་བ་ཆང་དང་ཡང་། །མེ་ཏོག་དམར་པོ་དང་ཡང་ལྡན། །ཁ་ནི་ནུབ་ཏུ་བལྟས་པའོ། །འོད་ཟེར་དམར་པོ་གྲི་གུག་དབྱིབས། །སྤྲོས་པས་བསྒྲུབ་བྱའི་སྙིང་ནས་བཟུང་། །དབང་དུ་འདུས་པར་བསམ་བཞིན་དུ། །ཆེ་གེ་མོ་བཛྲ་བ་རཱ་ཧི་ཨ་བེ་ཤ་ཡ་ཨ་ཨ། ལན་ནི་ཉི་ཤུ་རྩ་གཅིག་འབུལ། །དྲག་པོ་ནག་པོ་གྲུ་གསུམ་ལྷོ། །ཤིང་ནི་ནག་པོ་ཚེར་མ་ཅན། །མར་ཁུ་འབྲུ་ནག་ཤ་ཆེན་དང་། །ལིང་ག་མེ་ཏོག་ནག་པོ་དང་། །འོད་ཟེར་གྲི་གུག་ནག་པོ་ཡི། །བསྒྲུབ་བྱ་བཀུག་ནས་ལིང་ག་ལ། །བསྟིམ་ལ་ལྷ་མོའི་ཞལ་དུ་འབུལ། །བསྒྲུབ་བྱའི་སྡིག་དག་ཚར་བཅད་ནས། །ཆེ་གེ་མོ་མཱ་
1-2-232b
'ཧཱུྃ་ཕཊ། ཉི་ཤུ་རྩ་གཅིག་གིས་འབུལ་ལོ། །ཀུན་ལ་བསྟོད་དང་བཤགས་པ་བྱ། །ཡི་གེ་བརྒྱ་བཟླས་གཤེགས་པར་བསམ། །ཐལ་བ་ཆུའམ་རིའམ་རླུང་། །དག་ལ་གཏོར་བར་བྱ་བ་ཡིན། །ཀུན་ལ་དགོངས་དང་ཐུན་མཚམས་ཀྱི། །གཏོར་མ་འདི་ལྟར་སྦྱིན་པར་བྱ། །ལྷའི་བསྐྱེད་རིམ་ལྡན་པ་ཡིས། །དག་པའི་སྔགས་བརྗོད་སྟོང་པ་ལས། །རླུང་མེ་ཀཾ་ལས་འོད་གསུམ་མོ། །ཨ་ལ་ཀ་པཱ་ལ་ཆེན་པོའི་ནང་། །ཤ་ལྔ་བདུད་རྩི་ལྔ་བསམ་ལ། །ཨ་ལས་ཟླ་བ་རཾ་ལས་ཉི། །ཨོཾ་ཨཱཿཧཱུྃ་བསམ་ལ་མན་ངག་ཇི་བཞིན་བྱ། །འགྲོ་བ་སེམས་ཅན་ཐམས་ཅད་ཀྱང་། །ལྷར་གྱུར་མདུན་བསམ་གཏོར་མ་འབུལ། །བསྟོད་དང་གཏོར་མ་གསོལ་བ་གདབ༑ ༑བར་ཆད་སེལ་ཞིང་དངོས་གྲུབ་འགྲུབ། །དེ་ནས་གཏོར་མ་དག་ལ་འབད། །ཐུན་བཞི་ལ་སོགས་ཐམས་ཅད་དུ། །ལྷ་སྐུ་སྣང་སྟོང་དག་ལ་བསྒོམ། །སྤྱོད་ལམ་བཞི་པོ་ཐམས་ཅད་དུ། །ཟས་ཚོགས་མཆོད་པ་བྱ་བ་དང་། །དཀྱིལ་འཁོར་གསུམ་པོ་དྲན་པར་བྱ། །རྡོ་རྗེའི་གླུ་དང་གར་ཀྱང་བྱ། །ལྷ་སྐུ་སྒྱུ་མ་ལྟ་བུ་ལ། །གནས་སམ་ཡང་ན་སྤྱོད་པ་དག །ཡང་ན་ལྟ་བ་བློ་འདས་བསྒོམ། །ཡང་ན་བླ་མ་ནོར་བརྟེན་བསྟེན༑ ༑གང་ཡང་མེད་ན་ཐབས་ལམ་སྟོར། །འདི་བྱས་དྲི་མེད་དགེ་བ་ཡིས། །ནམ་མཁའ་མཐའ་ཀླས་སེམས་ཅན་རྣམས། །བདེར་གྱུར་མཐར་ཐུག་བླ་མེད་ཀྱི། །མཆོག་གི་དངོས་གྲུབ་ཐོབ་པར་ཤོག །
1-2-233a
༄༅། །དཔལ་རྡོ་རྗེ་རྣལ་འབྱོར་མ་གསང་བའི་སྒྲུབ་ཐབས་ཤིན་ཏུ་སྦས་པའི་གནས་སུ་གྱུར་པ། །རྡོ་རྗེ་འཆང་དང་མཁའ་འགྲོ་མའི་ཞལ་ནས། རབ་ཏུ་རྙེད་ནས་ཏེ་ལོ་པའི་ཐུགས་ལ་བྱོན་པ། །རྣལ་འབྱོར་དབང་ཕྱུག་ནཱ་རོ་པས་མཛད་པ་རྫོགས་སོ།། །།ནཱ་རོ་པས་དུར་ཁྲོད་དུ་རྗེ་ལོ་ཙཱ་བ་ཆེན་པོ་མར་པ་ལྷོ་བྲག་པ་ལ་གནང་ངོ་། །དེས་མི་ལ་ལ། དེས་བླ་མ་ལྷ་རྗེ་ལ། དེས་དུས་གསུམ་མཁྱེན་པ་ལ། དེས་བླ་མ་དབང་རྡོ་རྗེ་ལ། དེས་བླ་མ་མཁས་སྟོན་ལ། དེས་བླ་མ་ལ། དེས་གླན་དྷརྨ་ཤཱཀྱ་ལ་གནང་པའོ། །དེ་ལ་བདག་གིས་ཞུས་པ་ལགས་སོ།། །།


目录
དཔལ་རྡོ་རྗེ་རྣལ་འབྱོར་མའི་གསང་སྒྲུབ་བཞུགས་སོ། །
དེའི་རྒྱུད་པ།